A’AFIA SE ALI’I TALAVOU (POSITIVE) MAI AMERIKA (United States) I LE KOVITI-19, Aso To’onai 13 Fepuari 2021

Ua maua mai i ulua’i su’esu’ega fa’afomai le a’afia (positive test) o se ali’i talavou 16 tausaga le matua i le KOVITI-19. O lea ali’i na malaga fa’atasi mai ma lona tinā mai Kalefonia i le Malo tele o Amerika ma taunu’u mai i le Aso Faraile 12 Fepuari i le malaga mai Niu Sila, NZ990.

Na ulua’i fa’amaonia le a’afia o lea ali’i talavou mai su’esu’ega sa fa’atinoina i le Malae Va’alele ma le su’esu’ega lona lua sa fa’atinoina a’o taofia o ia i le Vaega Tu’uesea Fa’apitoa i le Falema’i. I le taimi nei e leai ni uiga ma āuga o le fa’ama’i ua a’afia ai lea ali’i talavou po’o ni vaaiga fa’aletonu i lona soifua maloloina.

Na taunu’u ifo le ua a’afia ma lona tinā i le Aso Lulu, 10 Fepuari 2021 mo le faigamalaga mai i Samoa lea na taunu’u i le Aso Faraile, 12 Fepuari 2021. E 26 itula sa i ai i Niu Sila ae le’i tu’uva’a mai i Samoa.

Ua mae’a fo’i su’esu’ega fa’afomai ma e le’o a’afia (negative) le tinā o lea ali’i. O le asō fo’i, Aso To’ona’i, 13 Fepuari 2021 na toe faia ai ia su’esu’ega ma māua ai, o lea tinā e leai se a’afiaga (negative).

I le taimi nei, e to’afitu nisi o le pasese na taunu’u mai fo’i i le malaga NZ990 o lo’o nofo va’ava’aia fa’afomai.
E to’alima ua a’afia ( historical cases) ae to’alua e false positive.

E to’aono mai Ausitalia ma le to’atasi mai Sudan na ui uma mai Niu Sila.

O lenei fo’i faigamalaga e 50 i latou ma malaga mai i atunu’u o lo’o pepesi ai le fa’ama’i e aofia ai:
• Ausitalia
• Amerika
• Peretani
• Initia
• Nigeria
• Aferika i Saute, ma e le’o i ai se tasi ua a’afia (negative) i le mae’a ai o su’esu’ega.

I le taimi nei ua fa’atinoina uma e le aufaigaluega ma le Matagaluega faiga fa’avae mo le malu puipuia o le atunu’u ma o le Aso Gafua, 15 Fepuari e toe faia ai su’esu’ega (tests) mo le pasese atoa na taunu’u mai i le faigamalaga NZ990.

E fa’afa ona faia su’esu’ega fa’afomai mo pasese a malaga nei mai atunu’u o le pepesi ai le fa’ama’i
i. Pe a taunu’u i le atunu’u i le malae va’alele
ii. Aso lona lima (5 days after arrival).
iii. Aso lona 14 (14 days after arrival)
iv. Aso lona 21 (21 days after arrival)

FAUTUAGA
E toe tapā ai le mamalu o le atunu’u ina ia mulimulita’ia ma ia usitaia fautuaga ua mae’a ona fa’asoa atu e le Matagaluega o le Soifua Maloloina e pei o le faia o tali fofoga, fufulu mamā o lima ma le alofia o nofoaga o lo’o to’atele ai tagata.

O nei lapataiga o lo’o fa’asalalau atu i luga o upega o tafa’ilagi (website) a le Matagaluega.

Ma le fa’aaloalo tele

Leausa Samau Dr. Take Naseri
FA’ATONU SILI
MATAGALUEGA O LE SOIFUA MALOLOINA See More



Source link